12. 1. 2016: В музею Варгола мож відїти далшы унікаты
• Єден із портретів голандьской кралёвны Беатрікс із ціклу Ендія Варгола – Владарї, котрый быв недавно інавґурованый у Музею модерного уменя Ендія Варголы в Міджілабірцях.
11-го децембра 2015 р. проходила в єднинім в Европі і другім на світї Музею модерного уменя Енді Варгола в Міджілабірцях інавґурація далшых 26-ёх унікатных творів в цїлім світї знамого умелця, котрого мено має і музей. Дакотры із них суть на теріторії середнёй Европы першыраз.
В музею суть по інавґурації выставлены образовы серії і індівідуалны образы. Тоты походжають із дакілько ґалерійных і пріватных збірок і представителї музею інформовали, же бы могли в Міджілабірцях быти выставлены аж пять років. Высоку вартость має і то, же образы, котры творять серії, мають індентічны чісла.
В музею мож теперь відїти серію Свята Аполонія, дві серії, котры походжають із ціклу Владарькы – Портрет голандьской кралёвны Беатрікс і Портрет свазійской кралёвны Ніомбі Твала. Тоты три серії мають по штири образы. Остатня серія, котра обсягує вісем образів, є творена Варголовыма творами із ціклу Квітя (чорно-біла).
В музею мож відїти і портрет гокейовой леґенды, в тім часі молодой гокеёвой звізды, Вейна Ґрецького. Ексклузівітов є на тім портретї то, же портрет має гокеїстово сіґнованя. Портрет Едворда Кенедія є доповненый о додаток „de luxe“, бо на портретї є діамантовый порох.
Найцїннїшыма з нововыставлёваных творів суть портет другой жены колишнього нюйорьского ґувернера Нелзона Алдріха Рокефелера – Марґареты „Happy“ Рокефелер, но і єден із двох образів унікатной серії Кралевна Алжбета ІІ. Унікатность образу є в тім, же другый із серії счезнув.
Музей модерного уменя Енді Варгола выникнув у Міджілабірцях 1. септембра 1991-ім роцї з ініціатівы главно трёх особ: Михала Бицка, Джона Варгола і Фреда Гуґеса. Моментално музей выставлює 170 творів Варгола.
Петро МЕДВІДЬ
